LEKSYON NIN PAG SALINGOY

LEKSYON NIN PAG SALINGOYby Calabanga Wagnurs

May sarong soltero gradwado sa kolehiyo,

Siya mahigos sa klase, asin matalento,
Nagmamawot makatrabaho, makaempleyo,
Sa sarong sanga kan satuyang gobyerno.

Sarong amay na aga siya nag asikaso,
Pasiring ahensya bitbit mga dokumento,
Ang ahensyang napili manungod sa pag agraryo
Eksakto pag abot yaon na si ma interview.

Ugmahon ang soltero, ta siya soboot pasado,
Pero igwa pang sunod, iyo ang final interview,
Sinubol siya sa sarong kwarto na nasa poro,
Duman ang opisina kan pinaka namamayo.

Pinatukaw siya kan maboot na sekretarya,
"Pakihalat halat po sir ta si boss maabot na",
Medyo kabado pero desididong maray siya,
Matrabaho siya, magurang matabangan na.

Ang pinaka Boss nag abot na sa opisina,
Sa madaling sabi siya hinampang na,
Hinagad mga papeles na dara dara niya,
Hanga ang Boss sa langkaw kan mga marka.

Hapot kan Boss ngaya noy nag iskolar ka?
"Sir, dai po" tulos na suminimbag siya,
"Mga magurang mo ang saimo nagpaeskwela? "
"Iyo po Sir, kaya pasalamat ako saenda"

"Ano ang hanap buhay ninda? " hapot saiya,
"Ako Sir, taas noo na isabi sinda PARA OMA"
"Alagad dawa po siring hanap buhay ninda",
"Napatapos ninda ako asin napa eskwela"

Hinagad kan Boss makapotan an kamot niya,
Tulos man ini idinuhol, may hihilingon daa,
Pakakapot kan Boss sa mga kamot niya,
Hanga ang Boss sa linig asin hitsura.

"Nagtatabang ka sa saendang pag oma? "
Simbag kan aki "dae po ta habo ninda"
"Gusto po ninda asikaso ko an pag eskwela"
"Saro pa, mas kabisado ninda ang pag oma"

"Bueno igwa akong sa saimo ipapagibo,
Atsan na hapon pag puli mo sa saendo,
Pakapahingalo ni papa mo hale sa trabaho,
Trabaho sa omang pinapagalan nya para saimo."

"Hugasan mo mga bitis asin kamot nya,
Sarayon, linigan mga gamit nya sa pag oma,
Despwes saaga alas dyes halaton taka,
Manungod sa sweldo mo, pag uulayan ta. "

Medyo nag ngalas alagad siya naogma,
Sa isip, sa wakas maaako aplikasyon nya,
Tulos nangako sa Boss na uutobon nya,
Ang sinugo manungod sa saiyang ama.

Pag abot nin harong, alas singko an hapon,
Tulos nagbisa ki papa asin ki mama na yaon,
Kinumusta si lakaw, saiyang aplikasyon,
Ngaya Pa maray asin kita may pag laom"

Alagad ngaya Pa, igwa lang ko uutobon,
Nakiulay ang Boss, kaipuhan ko gibohon,
"Haen mga gamit mo Pa? sakuyang lilinigon"
Asin tatabangan taka na ini sararayon.

Sabi kan ama ngaya Noy dai hare na,
Iyan sakuya nang gigibohon ta kaya ko na,
Alagad ang aki insistido, dapat utobon sinabi niya,
Hinanap si arado, asada, sundang asin pala,

Dinara sa gripo, saro sarong nilinigan nya,
Namatii nya sskripisyo kan saiyang ama,
Magagabat na gamit pirit kinakaya,
Asin napahurohud siya, garo may maturo sa saiyang mga mata.

Pagtapos sarayon mga gamit sa pag oma,
Dinumanan ang ama asin inalok nya,
"Madya na po Pa, may gigibuhon kita"
Salingoy si ama, Noy tano ngaya?

"Huhugasan ko mga bitis asin kamot mo Pa,
Ini tugon sakuya kan Boss sa opisina,"
Ngalas ang ama "tanu iyan kaipuhan pa? "
"Iyo po Pa dai ko lang aram ano rason nya"

Araakbay ang ama duman sinda sa gripohan,
Pag hugas kan bitis asin kamot pinunan"
Duman nya lang interong naturuhukan,
Mga bitis ni papa nya risa ang sinakripisyuhan.

Mga litgit, pila, asin asin kun ano anong gira,
Saboot nya ang Boss may gustong itama,
Saiyang narealizar padaba siyang maray kan ama,
Ni minsan dai sya sinugo mag dotdot sa daga.

Asin nagtungkahal sya sa saiyang Papa,
Dai nya napugulan pag turo kan luha nya,
Tulos kuminugos sa ama, mga luha nagdalihig sa mata,
Nagtatangis, mantang nakakugos sa ama niya.

Saiyang napag isip, sala na nagpabaya siya,
Dai nagtabang sa sakripisyo kan magurang para sa saiya,
Ngunian ang gabus naiintindihan na nya,
Dawa gurano kapadangat saiya, dapat nag sakripisyo man siya.

Alas diyes an aga, bwelta sya sa ahensya,
Asin duman ang Boss naabutan na niya,
Sa dai maintindihan, pakahiling sa saiya,
Otro tuminoro mga luha nya sa mga mata.

Dai to nakalihis sa paghiling kan Boss,
Nagtaram "Noy, naitindihan mo gabus? "
Sabay duko kan payo asin siya kinugos.
"Saaga kaipuhan taka, magpoon ka tulos! "

Sa sobrang kaogmahan, siya man napakugos,
Mayung ibang nasambit "Salamat Po Boss!!"
"Bako ka sakuya magpasalamat kundi sa mahal na Diyos"
"Siya ang nag giya saimo sa gabos gabos."

"Naoogma akong maray ta narealize mo,
Ang boot sabihon kan pinagibo ko saimo,
Arog kayan ang gusto ko sa mga empleyado,
Magin matinaad, matinabang sa kapwa tawo."

"Ang mga magurang natural ang pag padangat,
Alagad balusan nin kung anong nadadapat,
Mga pagsakripisyo ninda, sa saimo minulat,
Lugod maging leksyon pag kita na winalat..."